Lars drog i unge år til Bergen, kom der i teneste hjå kjøpmann W. Krohn. Han måtte vere godt likt, for han vart handelskar hjå Krohn. I 1792 drog han til Lærdal og vart styrar av handelen til landhandlar H. H. Lem, som då overtok det store godset Frønningen, der han busette seg, og let Lars Hilde styre handelen og gjestgjeveriet på Lærdalsøyra, etter råd av kjøpmann Krohn, som hadde særs god tiltru til Lars. I 1801 kjøpte så Lars Hilde verksemda av Lom for om lag 6000 rdl., ein pengesum som var uvanlig stor i dei dagar. Same år fekk han privilegium på handelen og gjestgjeveriet. Lærdal var då ein mykje søkt handelsstad med marknad, og L. Hilde tok inn gode pengar på verksemda si; han vart ein rik mann. Men i pengenaudstria ikring 1810 tapte han mykje av midelen sin. Så slutta han verksemda i Lærdal, kjøpte i 1810 Fresvik gods med 9 underliggjande gardar i Tjugum skpr. for om lag 4300 rdl. Same året kjøpte han Th Meidell sine eigedommari Fresvik for 8400 rdl. Ni år seinare kjøpte han kaptein G. Dahl sin eigedom i Bøthun for 900 spd., og då åtte han mest heile Fresvik og var vorten ein av dei største jordegodseigarane på Vestlandet. Eigedomen i Lærdal selde han i 1812 til T. Døsen for 35 000 rdl.