Øvre Vik 8: Nilsagarden (Vadvollen).

Hans kom til Vik i lag med mori som vart attgift dit. Han arva ein lut i Vik etter faren og kjøpte noko av presten Gelmeiden i 1699. Dessutan bygsla han hjå Halsnøy det som stykfaren hadde hatt tilslutt. Hans var velstandsmann og som son etter futen hadde han vel ein viss posisjon i bygdi. Han hadde og fleire tillitsyrke i fyrstingi, soleis vart han kost. lensmann etter Samson Råen i 1707, men det gjekk ikkje av visse grunnar, for Hans Hanson hadde sine bolkar då han ikkje var heilt med seg sjølv, og verre og verre vart det med åri. Han vart folkesky, stengde seg inne, las og grubla, og ein sundag etter å ha vore i kyrkja, gjekk han stad og enda livet sitt idet han hengde seg i smia. Han etterlet seg i arv 490 rdl., derav mykje sylvsaker som delvis var arva etter bestefaren hr. Torlak i Vikøy.