Hr. Torlak gjekk på skule i Helsingør og København og er vel den fyrste prest i Vikøy som hadde nokolunde full utdanning for embetet. Han var student fra Helsingør skole 8.4.1616 og først hjelpeprest hos Daniel Jørgensen i Hjelmeland, men i 1623 kom han til Vikøy. I kyrkjerekneskapane for dette året stend det at ombodsmannen gav prosten hr. Anders i Kinsarvik 1 rdl av kvar kyrkja forat han skulle setja hr. Torlak inn i embetet. Her var Torlak verande til sin død 11. mars 1654. I 1639 vart han mellombels prost i Hardanger medan styremaktene granska nokre klagemål frå ålmugen mot prosten hr. Anders i Kinsarvik, og i 1649 er han og nemnd prost og visiterar dette året kyrkjestolane i prostiet. Om hr. Torlak fortel soga berre det som godt er. Han skulle vera ein "from" kristen og vel omtykt. Som bondeson av dei beste ætter på Vestlandet kan ein tenkja seg at han naut vyrdnad og tillit hjå ålmugen og kunde ta dei på rette måten og føra inn på den rette låm. Han var velstandsmann og åtte gardar og gardpartar både i Rogaland og Sunnhordland. I Kvam åtte han part i Nesthus. Av gamle diplom ser ein at hr. Torlak ikkje var nokon kastekjepp når det gjaldt å verna prestebordet sine eller eigjne interesser. I 1634 gav han ei ny altartavle til Vikøy kyrkja. Denne tavla er visseleg Stavanger-arbeid i renessanse-stil.