Fabian vart gift med ekkja etter Ola Larsson Kuven i 1638 og fekk bruket. Kona døydde straks etter, og Fabian gifte seg att i 1641 med ei som heitte Synneva. Ho fekk fyrste barnet sitt berre eit halvt år etter brudlaupet, og for det måtte Fabian leggja ei stor bot. Kvar Fabian var frå, veit me ikkje. Han var ein mykje vyrd mann i bygdi og var doms- og lagrettemann i mange år. Fabian var ogso lagrettemann på “fylkestinget” for Sunnhordland, og var med og sagde dom i mordsaki på Steinsland (Se S. B. 464). Han dreiv mykje med skogarbeid og selde timber og trevaror til skotteskipi som låg i Hatvik. Jordeigaren presten Loss hadde sett forbod mot å hogga skog i “Brandaneset”, og då Fabian i 1656 likevel hadde hogge der, tok presten han for retten.