På Onarheim på Tysnes har frå eldgamle tider vore eit sentrum i Sunnhordland, der vart og fjordingstinget halde og der stod gildehallen. Sigurd på Onarheim er ein av rikshovdingane i 1220-åri. I 1374 eig sysselmannen på Voss Jørund Arneson denne garden, og enkja hans, Gyrid Hallbjørnsdotter, budde der i 1410. Ho er tvillaust ei dotter til Hallbjørn Sigurdson på Våge på Varaldsøy, og soleis er nok denne garden komen i Onarheim-ætti si eiga. Millom arvingane henner er Stein Jardarson på Malkenes som er far til Anders på Onarheim. Son hans att Ivar på Onarheim døydde ikr. 1543. Brørne Jørgen og Svein Pedersøner er arvingane hans, sidan mormor deira var syster til Ivar.

Jørgen skriv seg både til Onarheim og Malkenes og må soleis ha arva båe slektsgardane.