Torkjell tok garden i 1788, og gifta seg fire år seinare. Giftarmålet knytte band med eit sosialt toppsjikt lenger ute i bygda. Torkjell sjølv var av velståande folk og hadde ein gild gard. Men om barneflokken til Torkjell og Ingeborg ikkje vart av dei største, var det vanskeleg nok å få alle sømeleg plasserte. To av sønene delte Nigardsbruket mellom seg. Den eldste hadde skøyte på Oppigard då han gifta seg i 1816, men faren Torkjell heldt fram som brukar like til den store ulukkesdagen den 29. februar 1824: På kyrkjeferd til Åkra kantra ein båt, og fem menneskje frå Vinja, Skjold og Øyno sette livet til. Torkjell var ein av dei.